PRESBYTERIAN WOMEN FELLOWSHIP (Khuga Sadar Presbytery) KHANGTHU
PWF Chanchin I suina ah, I ki ngak zingna di’n Pathian thu Marka 4:32 hi mangcha hiti. A umzia chu neucha apat hunglian (From small to Great) ahi. Thagau ah ei hingtu nuleh pa masate chun, chanchinpha hun pawluttu Pu. Watkin Robert chu a dinmun a siat pen in le belzel guatna in independent in ala umzing ua. Hun hung chia zel in pampai gual ah a kihet ziakun sap tangval W. Robert chu ala pawtsan tau ahi. Zia apat chun kizawppi ding hawl in I pau kibatpi MCO. Tu EOC Iti puitute kiang kava dawngua, limna Thagau ziaka alan pawm ziang theilo ala hituak hi. Zia ban kit ah chun Mizoram Presbyterian hi zawm nuam in lekha ala pelut ua, Synod inle a kantha ding in Rev. Saiaithanga leh Upa khat ahun sawl ua, Saipum Kochuam in a hung tung ui, Zia hun ma ahin Cachar Hill Tribe Synod Halflong lam ah le lekha kidawtna ala nei ui. General Assembly PCI chun Presbyterian inkuan ah siam thei ding Assembly Officers pathum lam ahun sawl ua, ziate chun Presbyterian mi leh sa hiding in eila enkawl uh ahi. Rev. B. Lalhnuna chun Manipur ah “Presbyterian Kolut Masapente chu KSP a hiu hi.” Ala gen hi. Manipur Gam Presbytery Iti pen hileh (F) Pu. Siaklam in ala puakdaw ahi. Manipur Gam Presbytery tawh hung kikhen kit in KSP ah chun Vaiphei pau mang te leh Thado pau mang te ila kigawm uh ahi. KSP min I put til a pat in Kochuam sung ah numeite hi gelkhawk zel ala hia. Numeite Thagau ah chawk hal ding Numei Sawlchak (Nu leh Pa masate gendan in Numei tilko) ala ti ziang sek uh chu ala nei ua. Ziate chu Evan. Ngulkhothang Evan. Dolian leh Evan. S.T Hauva te ahiu hi. Amin phuak uh chu Numei Sawlchak ti himaleh KSP. Pumpi Thagau a chawkhaltu Pathian matchakte ahiu hi.
Chun, a bultilim a chun, Women Christian Association (WCA) ti al ahia, KSP ah chun Central WCA ti ala hi pek ah, A 36 tinna khawmpilian 2004 a pat in PWF ti ahung hitai. Hun bul lam ah chun upate chu Central PWF. Chairman ala hizing ua. Chairperson PWF hung hi masapen chu Famta Pi. V.L. Suangi akka hi. Nu masate chu lekhathiamlo ala hi chiat deu ziakun, Pathian thu Bible Chang kidemnate, la pawl kidemna, leh Pathian thu ah ki gualsiakna dang dang leh mimal lasak kidemnate hi ala nei zingsek ua. Golden Jubilee lopna kum tiang inle zia hi chiapi naklai di ti chu Committee PWF phasak dan ahi.
Central PWF in ala malakna khenkhat taklat theite chu Nek hawlna panpitu ding ah puankhui zilsaknate le ala nei uh ahi. Zia malakna chu Govt. Hiatpi theina’n Women Skill Development Project (WSDP) ala tiu hi. Zia nasepna WSDP hi chiatha zel theilo ahi phot hi. Chun PWF nasep pawimaw tak mai chu The Good Shepherd Home (Orphanage )hi ahi. Tutiang in nauchaga um hi mi paguk ahi tau hi. Pathian zal ah zia nasepna hin masawn zel ding ahi. Central PWF nuai ah Districts PWF te malakna chi chuam chuam taklang kimthei puai ti, ahinla alo theilo ah taklat kiphamaw te chu ziate hi ahi. 1) Sadar District PWF chun bialsung ah mithi a um phat leh vuiliamni zaw, (a zing kit) thandalni hi leh Programme siam in chini bawngnawi chawikhawm in anchang chawi thei in, chawi in Pauchapna hun a matpi sek ua, et tawntak Pathian nasepna chu ahi. 2) Khuga District Numeite chun damlo Hospital ah kaitua ah um Kochuam member kuale a vetha zing sek uh ahi. 3) Tuithanak District leh Town District PWF inle Nungak/ Tangval Kochuam Dan thiangtho ah kichengte chu tilkhona thilpiak lultak a pe zing sek ui. 4) Pauchapna lampang ah PWF malakna in pauchap pawl Esther Prayer Team (EPT) patdaw ahi. Zia chu Missionary Chawpna, Tuinak a hung hita hi. 5) PWF numasate chun Kross Sepai ti in gamthimna ala sem ua, zia chu Manipur Synod ah thulut ah siam in Manipur Synod in le lemasak ziak in Missionary Evan. Chinzakapte kum 20 vel ala chawm tau in, tuhin Evan. Pauthianlal sekmai in asepsak zing thei tau hi. 6) Pauchapna kut kumkhat ah thumvei lam a guanggal zingte ban in, Pastor Bial tin ah anngawl ah Pauchapna Programme Kinei sekte hi, thilpha chia zawm zel ding ah dawisak um ating hi. 7) Presbytery Annual Session Neina ding mun ah, PWF in pauchapna hun khatvei ala nei zing uh hile, Kochuam pawlpi (KSP) in thagau lam in a phatchuampi takzet hi.
PWF Chu abul kipatna chu I changtel in agengual in, abul kipatna chu ankam mu gual in neucha ala hi ngut hi. I mawl leh mi I phaklo ziakua, Bible chang gen kidemnate, mi mal lasak kidemna te, la pawl sak kidemna te hi I la nei sek gual in mi khenkhat n a gensek uh hile diktho ding ahi. Ahinla, tinlo takleh neuchaa pat hung ki pan ankam mu chu ahung khanlet phat leh chunglenbg vacha te’n le a zal a zosek uh ahigual in, PWF le Nauchaga nu leh pa leh kingakna ding nei mumallo tenle a zal a zo tau hi. PWF hi midang tamtak in le a zal a zaw zawk sem ding in GOLDEN JUBILEE I lop kum a pat in hung pak valzel din Pathian khut in I ki pelut zel ding uh ahi.
A chiata Kumte vak gel in nu leh pa masate ziak in Kipakthu Pathian kiang in gen hitiu in, Ama Lopina piai tiu.
Tuhun ahin, bangkim thil vel in Ama Pathian hing Nasepchu ha bawl hitin.
Hun hung tung ah chun le Ama Pathian chu Kineppi zing hitiu.
(Looking back we thank HIM, Looking around we serve Him, Looking Ahead We Expect Him)
Quoted from Upa. S. Dolian Capvung.
